Беларускія спецслужбы перадухілілі ўдары беспілотнікаў з тэрыторыі Літвы па аб’ектах у Мінску. Пра гэта заявіў кіраўнік КДБ Іван Церцель 25 красавіка на Усебеларускім народным сходзе.
— У Літве і Польшчы радыкалы вырабляюць баявыя дроны для нанясення ўдараў па крытычна важных аб’ектах на тэрыторыі Беларусі, — заявіў Іван Церцель.
Паводле кіраўніка КДБ, «суседняя Літва стала месцам базавання вільнюскай харугвы», дзе «пад кіраўніцтвам радыкалаў» і «ў непасрэдным кантакце з літоўскім парамілітарным фарміраваннем „Клуб стралкоў“ распрацоўваюць планы па заходзе для здзяйснення тэрактаў на тэрыторыю прылеглых да Літвы Ашмянскага, Смаргонскага і Браслаўскага раёнаў, перакідванні і арганізацыі ў Беларусь схованак са зброяй, выбуховымі рэчывамі і іншымі сродкамі паражэння».
— КДБ ва ўзаемадзеянні з калегамі з іншых структур апошнім часам праведзены шэраг вострых чэкісцкіх мерапрыемстваў, які дазволіў перадухіліць нанясенне ўдараў баявымі дронамі з тэрыторыі Літвы па аб’ектах у Мінску і яго прыгарадах. Працу па гэтым напрамку працягваем, дэталёвую інфармацыю агучыць грамадскасці пакуль не ўяўўляецца магчымым, — сказаў Церцель.