У Варшаве беларуска і яе муж звярнуліся ў бальніцу з нагоды стану свайго 10-тыднёвага дзіцяці. Немаўля важыла ўсяго 1,5 кілаграма. Агледзеўшы яго, дактары заключылі, што яно вельмі знясіленае і недаядае. Пачуўшы словы медыкаў, муж і жонка пакінулі бальніцу разам з дзіцем, паведамляе MOST са спасылкай на Miejski reporter.
Інцыдэнт адбыўся ў ноч на 22 траўня ў дзіцячай бальніцы па вуліцы Каперніка. Дактары паведамілі пра здарэнне паліцэйскім.
Тыя знайшлі сям’ю, выкліканая хуткая зноў даставіла дзіця ў бальніцу.
Бацькоў затрымалі. Тэст паказаў у абаіх 1 праміле алкаголю ў выдыханым паветры. Ім выставілі абвінавачанні ў пакіданні ў небяспецы асобы, якая знаходзіцца пад апекай абвінавачанага. За гэта ў Польшчы пагражае пакаранне ад трох месяцаў да пяці гадоў пазбаўлення волі.
Следства па справе вядуць раённая паліцыя і пракуратура. Таксама пра справу паведамілі ў сямейны суд варшаўскага раёна Воля.