Увечары 6 верасня ў раёне будынка на праспекце Незалежнасці, 84/3 прарвала трубу метровага дыяметра з халоднай вадой, паведамілі ў МНС. Парушалася водазабяспечанне ў Партызанскім, Першамайскім і Савецкім раёнах сталіцы. Ноччу ўжо 7 верасня падачу вады аднавілі па абводных лініях. Але медыкі пакуль не рэкамендуюць яе выкарыстоўваць.
«Арганізоўваўся падвоз пітной вады. Пацярпелых няма. Меркаваная прычына парыву — знос вадавода», — расказалі ў МНС.
У Партызанскім, Першамайскім і Савецкім раёнах магчымае пагаршэнне якасці водазабяспечання, паведаміла санітарна-эпідэміялагічная служба горада Мінска.
Цяпер «Мінскводаканал» прамывае трубы ў зоне здарэння.
«Спецыялістамі санітарна-эпідэміялагічнай службы сумесна са спецыялістамі „Мінскводаканал“, пры атрыманні інфармацыі пра заканчэнне работ па ліквідацыі аварыі, плануецца правядзенне адбору пробаў вады ў зоне ўплыву для лабараторных даследаванняў па паказчыках бяспекі па хімічным складзе і паказчыках мікрабіялагічнай бяспекі», — праінфармавалі ў Мінскім гарадскім цэнтры гігіены і эпідэміялогіі.
Пазней у сталічным цэнтры паведамілі, што ў сувязі з узнікненнем аварыі на цэнтралізаванай сістэме пітнога водазабяспечання рэкамендуецца выкарыстоўваць бутыляваную ваду.
«Для пітных мэтаў, гатавання ежы і выканання правілаў асабістай гігіены насельніцтву Першамайскага, Партызанскага, Савецкага раёнаў рэкамендуецца выкарыстоўваць падвозную або бутыляваную ваду», — гаворыцца ў паведамленні.
Падвоз вады «Мінскводаканалам» арганізаваны па наступных адрасах:
- Лагойскі тракт, 8,
- вул. Фрунзе, 3
- вул. Авангардная, 42,
- вул. Макаёнка, 17,
- вул. Каліноўскага, 34,
- вул. Ф. Скарыны, 7,
- вул. Навуковая, 4,
- вул. Сувязістаў, 7,
- вул. Карвата, 76,
- вул. Солтыса, 60,
- ул. Валгаградская, 19Б.
Спецыялісты тэрытарыяльных установаў дзяржаўнага санітарнага нагляду кантралююць прыгатаванне ежы і выкананне правілаў асабістай гігіены ва «ўстановах адукацыі на тэрыторыях у зоне ўплыву аварыі».