Варшава вырашыла закрыць памежны пераход «Баброўнікі» на мяжы з Беларуссю «ў інтарэсах дзяржаўнай бяспекі». Але версіі, чаму гэта адбылося, у Польшчы і Беларусі прапануюць розныя.
Крыніца ТАСС, «блізкая да Дзяржаўнага памежнага камітэта Беларусі», заявіла, што гэта адбылося праз незадаволенасць уведзеным Мінскам у аднабаковым парадку бязвізавым рэжымам для жыхароў Польшчы, Латвіі і Літвы.
«Паводле паведамлення польскага боку, рашэнне прынятае з меркаванняў „грамадскай бяспекі“. Насамрэч гэта супрацьдзеянне „бязвізу“, ён іх раздражняў, гэта было заўважна. Быў дазволены рашэннямі абласных выканкамаў вываз тавараў народнага спажывання без абмежаванняў праз мяжу асобам, якія ішлі ў бязвізавым парадку, гэта іх раздражняла, бо ў нас танней», — сказаў суразмоўца агенцтва.
Ён дадаў, што «ў большай ступені гэта ўдарыць якраз па асобах, якія прыязджалі па «бязвізе».
Крыніца ва ўрадзе адной з найбуйнейшых польскіх радыёстанцый, RMF24, паведаміла, што рашэнне Варшавы — адказ на прысуд Андрэю Пачобуту і іншыя дзеянні беларускага рэжыму супраць польскай меншасці.
«Гэта ядзерны варыянт і сігнал пра тое, што мы можам цалкам адрэзаць Беларусь ад Захаду», — заявілі радыёстанцыі. Таму не выключаныя рашэнні адносна закрыцця пунктаў пропуску ў «Тэрэспалі» і «Кукурыках».
Непасрэдную сувязь паміж прысудам Пачобуту і закрыццём пункта пропуску бачыць і адно з найбуйнейшых СМІ Польшчы — газета «Выборча», бо рашэнне пра «Баброўнікі» і абяцанне новых санкцый за суд над журналістам былі ў адным паведамленні МУС Польшчы.
Нагадаем, што пункт пропуску «Баброўнікі» на мяжы з Беларуссю з 10 лютага прыпыніць працу, паведаміў міністр унутраных справаў і адміністрацыі Польшчы Марыюш Каміньскі. Ён заявіў, што рашэнне пра закрыццё руху праз «Баброўнікі» прынятае «ў мэтах дзяржаўнай бяспекі».
Раней, у 2021 годзе, польскі бок з прычыны міграцыйнага крызісу закрыў пункт пропуску на беларуска-польскай мяжы «Брузгі — Кузніца Беластоцкая». Яшчэ раней, у 2020 годзе, з ініцыятывы польскага боку праз COVID-19 былі закрытыя пункты пропуску «Славатычэ — Дамачава» і «Полаўцы — Пясчатка».
Такім чынам, на беларуска-польскай мяжы застаецца толькі два дзейныя пункты пропуску — для грузавога транспарту ў Польшчу застаецца адзіны пункт пропуску «Кукурыкі» (з беларускага боку — «Казловічы»), а для легкавога — пункт пропуску «Тэрэспаль» (з беларускага боку — «Брэст»).