У Літве афіцыйна пацвердзілі спыненне пропуску грузавых цягнікоў, якія ідуць з Беларусі, праз памежны пераход «Беняконі — Стасілас», пра што напярэдадні паведамілі беларускія СМІ. Рух закрываецца з 16 лютага. Заяву пра гэта апублікавала Літоўская мытня.
«Гэтыя меры прымаюцца ў сувязі з вялікімі патокамі кантрабанды, якая перавозіцца цягнікамі з Беларусі, і звязанай з гэтым павышанай пагрозай нацыянальнай бяспецы Літвы», — заявіла ведамства.
Рэч у тым, што на пункце «Стасілас» няма сістэм рэнтгенаўскага надгляду для цягнікоў, гэта ўскладняе выяўленне кантрабанды ў грузавых вагонах — у першую чаргу гаворка пра беларускія цыгарэты.
А колькасць такой кантрабанды праз «Стасілас» у апошнія гады моцна вырасла, паведамляе мытня Літвы. Так, у 2022 годзе на пункце выявілі 28 выпадкаў перавозкі кантрабанды ў грузавых вагонах і канфіскавалі 2 млн 540 тыс. 669 пачкаў беларускіх цыгарэт. Гэта склала 87,6% ад усяго аб’ёму кантрабанды, перахопленай літоўскімі мытнікамі на чыгунцы за год.
Праз «Стасілас» да закрыцця праязджалі ў сярэднім два грузавыя цягнікі з Беларусі штодня. Цяпер усе яны будуць накіроўвацца праз адзіны чыгуначны памежны пераход, які застаўся: «Гудагай — Кяна».
На пункце пропуску «Кяна» стацыянарныя сістэмы рэнтгенаўскага кантролю ўсталяваныя, і з моманту іх з’яўлення кантрабандысты ўнікаюць гэтага маршруту. Рэнтген працуе кругласутачна, дазваляе прапускаць цягнікі вельмі хутка, без прыпынення руху, і даглядаць 100% вагонаў. Ён даказаў сваю эфектыўнасць: так, у канцы 2022 года ў «Кяне» памежнікі выявілі ў грузавым цягніку гіганцкую партыю кантрабандных беларускіх цыгарэт аб’ёмам 672 тыс. пачкаў на 1,5 млн еўра.
Таму пропуск цягнікоў з Беларусі праз пункт «Стасілас» будзе закрыты, пакуль там не ўсталююць рэнтгенаўскія сістэмы. І гэта надоўга: як паведамляе мытня Літвы, іх усталяванне запланаванае толькі на канец 2024 года.