У інтэрв'ю LIGA.net. пасол Ігар Кізім пракаментаваў дыверсію ў Мачулішчах, адзначыўшы, што спецслужбы сёння — гэта галоўны голас у беларускай палітыцы.
Ігар Кізім упэўнены, што падзеі вакол таго, што адбылося ў Мачулішчах, будуць развівацца так, як абяцаў Лукашэнка.
— Апазіцыя і партызаны існуюць. Гэта праўда. Калі Лукашэнка даў указанне ўсіх шукаць і караць, значыць, так усё і будзе.
Пасол адзначае, што беларуская прапаганда звычайна падае раскрыццё такіх справаў як дасягненне спецслужбаў. Хоць фільмы, якія расказваюць пра дэталі «спецаперацый», «нічога, акрамя смеху, не выклікаюць», лічыць Кізім.
— Яны мусяць нешта рабіць, даказваць сваю карыснасць. Усё будуецца на тым, што спецслужбы сёння маюць асноўны голас у беларускай палітыцы, — кажа Ігар Кізім.
Ён шчыра прызнаецца, што сам «не ў захапленні ад прафесіяналізму беларускіх спецслужбаў». І тут жа прыводзіць некалькі аргументаў:
— Дазволю сабе трохі ўбок пайсці. Ведаеце, дзіўная рэч атрымліваецца. Расійскі самалёт быў пашкоджаны падчас атакі з тэрыторыі Беларусі. У Чыкагскай канвенцыі ваенныя паветраныя судны маюць прынцып экстэрытарыяльнасці: фактычна гэты самалёт — тэрыторыя Расіі, і з тэрыторыі Беларусі адбыўся напад на тэрыторыю Расіі. Я карыстаюся тут логікай беларускага кіраўніцтва. І калі браць яе, то ніякага нападу з тэрыторыі Украіны не было. А калі б нават і быў, то ў нас ёсць поўнае права — мы ж б’ём па тэрыторыі Расіі.
Дыпламат не згадаў пра тое, ці мелі магчымасць прадстаўнікі пасольства сустрэцца з падазраваным у падрыве расійскага разведвальнага самалёта А-50У Мікалаем Швяцом. Аднак расказаў, што на сённяшні дзень у Беларусі сем грамадзян Украіны арыштаваныя за шпіянаж і доступу да іх няма.
— Сваякі і мы стараемся неяк да іх дабрацца, але калі ўзяўся КДБ — то не пускаюць нават консула і прызначаюць свайго адваката, які нічога не кажа.
Ён падкрэсліў, што цяпер магчымасці пасольства і консульства вельмі абмежаваныя, таму што «беларускі бок разглядае нас патэнцыйнымі ворагамі».
Нагадаем, Лукашэнка 7 сакавіка расказаў пра затрыманне «тэрарыста ўкраінскіх спецслужбаў і ягоных памагатых», якія датычныя да спробы дыверсіі ў дачыненні да самалёта А-50 на аэрадроме Мачулішчы. Пазней у гэты ж дзень дзяржТБ паказала кадры затрымання і допыту галоўнага падазраванага — грамадзяніна Украіны Мікалая Швяца. Мужчына заявіў, што ён з дапамогай двух дронаў падарваў самалёт, працаваў разам з СБУ.
