Аляксандр Лукашэнка прызначыў паслоў у Кітай, Зімбабвэ, ПАР, Сербію і Інданезію, піша прэс-служба.
Аляксандр Чарвякоў, які працаваў на пасадзе міністра эканомікі, прызначаны надзвычайным і паўнамоцным паслом у КНР.
Прызначаючы Чарвякова на новую пасаду, Лукашэнка падкрэсліў, што ягоны досвед «дазволіць падняць адносіны з Кітаем», які разам з Расіяй «уваходзіць у лік асноўных партнёраў» Беларусі.
— Дапамагаюць нам і тэхналагічна самымі высокімі тэхналогіямі, і ў фінансавым плане, — цытуе палітыка БЕЛТА.
Ігар Маршалаў, які займаў пасаду намесніка старшыні Камітэта дзяржкантролю — дырэктара Дэпартамента фінансавых расследаванняў і знаходзіўся ў камісіі па вяртанні беларусаў, прызначаны надзвычайным і паўнамоцным паслом у Зімбабвэ.
Ігар Маршалаў — былы намеснік старшыні КДК, экс-кіраўнік Дэпартамента фінансавых расследаванняў (ДФР), узнагароджаны ордэнам «За службу Радзіме» III ступені, медалямі «За бездакорную службу» I, II і III ступені. У траўні 2021-га за яго подпісам у ПВТ паступіў ліст, у якім Маршалаў прасіў назіральную раду разгледзець пытанне пра страту ТАА «ТУТ БАЙ МЕДЫЯ» права на льготы ў 2019, 2020 і 2021 гадах.
У 2018-м за ягоным кіраўніцтвам ДФР праводзіў ператрусы ў незалежным прафсаюзе РЭП па абвінавачанні кіраўнікоў у нявыплаце падаткаў, пазней ім прызначылі па 4 гады «хатняй хіміі». У чэрвені таго ж года праводзіўся ператрус у дырэктара БелаПАН Алеся Ліпая па крымінальнай справе пра нявыплату падаткаў у буйным памеры. Ліпай прызнаў парушэнне і заплаціў падатак і пеню, аднак папярэдняе расследаванне працягнулі. Справу закрылі ў сувязі з яго смерцю 23 жніўня.
Надзвычайным і паўнамоцным паслом у ПАР і па сумяшчальніцтве ў Батсване, Мазамбіку і Намібіі прызначаны Ігар Белы. Дагэтуль ён працаваў начальнікам Галоўнага ўпраўлення Азіі, Афрыкі і Лацінскай Амерыкі МЗС.
Сяргей Маліноўскі, які кіраваў галоўным інфармацыйна-аналітычным упраўленнем МЗС, прызначаны надзвычайным і паўнамоцным паслом у Сербіі і па сумяшчальніцтве ў Паўночнай Македоніі.
Раман Раманоўскі прызначаны надзвычайным і паўнамоцным паслом у Інданезіі і па сумяшчальніцтве ў Малайзіі, Сінгапуры і Філіпінах. Да прызначэння ён працаваў намеснікам начальніка галоўнага ўпраўлення — начальнікам упраўлення агульнаеўрапейскага супрацоўніцтва галоўнага ўпраўлення Еўропы і Паўночнай Амерыкі МЗС.
Лукашэнка таксама даў згоду на прызначэнне генконсулам у г. Мумбаі (Індыя) Аляксандра Мацукова, які дагэтуль працаваў начальнікам упраўлення па пытаннях грамадзянства і выезду за мяжу галоўнага консульскага ўпраўлення МЗС.
Кадравыя перастаноўкі Лукашэнка правёў пасля карупцыйнага скандалу. Раней КДБ паведаміў пра затрыманне шэрагу высокапастаўленых супрацоўнікаў буйных беларускіх прадпрыемстваў у малочнай галіне. Як сцвярджаюць сілавікі, малочная прадукцыя з беларускіх прадпрыемстваў прадавалася з мінімальнай нацэнкай ці нават ніжэй за сабекошт фірмам-«пракладкам» у Расіі, а тыя пастаўлялі прадукцыю на рынак па рынкавай цане. Даход пакідалі сабе службовыя асобы прадпрыемстваў і прадстаўнікі камерцыйных структур, частка грошай ішла на хабар. Па справе затрымалі 15 чалавек, уключаючы гендырэктара ААТ «Бабуліна крынка» Генадзя Скітава.
Чытайце таксама
