У кампаніі, якая кіруе сеткай былых рэстаранаў McDonald’s, змянілася назва. Гэта вынікае са звестак Адзінага дзяржрэгістра юрыдычных асобаў і індывідуальных прадпрымальнікаў (АДР). «Люстэрка» расказвае, што яшчэ змянілася ў былой сетцы вядомага фастфуду.
Што змянілася ў сетцы фастфуду
Рэстаранамі сеткі Mak.by (былы McDonald’s) кіравала кампанія «КСБ Виктори Рестораны». У снежні мінулага года яна афіцыйна змяніла сваю назву на «Мак.Бай», вынікае з АДР.
Аднак уладальнікі ў сеткі фастфуду не змяніліся. «Мак.Бай» усё яшчэ належыць іншай фірме — «Кволити Фуд». Ёй, у сваю чаргу, валодаюць вядомы бізнесовец з малочнай галіны Аляксей Саўчук і бізнесвумен, якая шмат гадоў кіравала сеткай McDonald’s, Вікторыя Данько.
Нагадаем, раней праз сінгапурскую «маму» кампаніяй валодалі бізнесовец з Казахстана Кайрат Баранбаеў і дырэктарка сеткі рэстаранаў у Беларусі Вікторыя Данько. Аднак у пачатку 2024 года ўлады Беларусі праз Дзяржкаммаёмасць спрабавалі «адціснуць» бізнес у «КСБ Виктори Рестораны».
Пасля гэтага фірму выкупіў Аляксей Саўчук.
Цяпер у сеткі 26 рэстаранаў хуткага абслугоўвання. Увосень мінулага года з гандлёвага рэестра былі выключаныя два пункты — на Сурганава і Лагойскім тракце ў Мінску. У гэты ж перыяд адкрыўся пункт харчавання на Пятра Мсціслаўца ў сталіцы.
Кароткая перадгісторыя таго, што адбылося з McDonald’s
11 лістапада 2022 года стала вядома, што McDonald’s пакідае беларускі рынак. Яго месца збіралася заняць расійская сетка фастфуду «Вкусно — и точка». Кіраваць ёю мусіла тая ж кампанія, што і рэстаранамі McDonald’s, — «КСБ Виктори Рестораны». На той момант фірма яшчэ належала Кайрату Баранбаеву і Вікторыі Данько.
Але ў лістападзе 2022 года Аляксандр Лукашэнка, каментуючы сыход McDonald’s, заявіў, што яго месца мусяць заняць беларускія прадпрыемствы і вытворцы. Так прыход «Вкусно — и точка» не адбыўся, а экс-McDonald's працягнуў працу пад незразумелым брэндам «Мы открыты». У красавіку 2023 года кампанія «КСБ Виктори Рестораны» падала заяўку на рэгістрацыю новага таварнага знака, пасля чаго сетка рэстаранаў хуткага харчавання змяніла назву на «МАК.by».
У 2023-м і пачатку 2024-га Дзяржкаммаёмасць праз суды дабівалася ппрыпынення дзейнасці «КСБ Виктори Рестораны» і яе кіпрскай «мамы». Чым усё скончылася, не паведамлялася, у Вярхоўным судзе засакрэцілі гэтую справу.
Што казаў Лукашэнка пра (не)McDonald's
Аляксандр Лукашэнка як мінімум двойчы намякаў на тое, што мінулыя ўладальнікі рэстаранаў McDonald’s у Беларусі страцілі свой бізнес. У снежні 2022-га ён заявіў, што гэта «нашае прадпрыемства»: «Лічыце, што гэтае прадпрыемства вашае. І па прыездзе неадкладна рэалізуйце гэтае ўказанне. Не чакайце нейкіх дакументаў. Скіруйце ва ўрад. Яны вам адказ дадуць. Думаю, пасля сённяшняга яны вам да Новага года памяняюць уласніка».
Другі раз палітык згадаў гэты бізнес у пачатку 2024 года: «Мы дамовіліся: ніякай маёмасці мы нікому не прадаём, не перадаём, калі ў выніку санкцый ці нейкіх іншых прычын замежнікі, якія маюць тут уласнасць, прадпрыемствы, кампаніі, сыходзяць з нашага рынку. Як я казаў, дасвідос — мы разбяромся самі. І, як паказвае той жа „Макдональдс“, мы выдатна ў гэтым разабраліся: людзі з задавальненнем ходзяць туды».
Чытайце таксама
