Выпадкі, калі сямейныя пары знаходзяцца ў шлюбаразводным працэсе і мужчыны ініцыююць ДНК-экспертызу, не рэдкасць. Пытанне выплаты аліментаў у такіх гісторыях значнае. Як адзначылі ў Дзяржаўным камітэце судмедэкспертыз, часам сумневы небеспадстаўныя.
Для высвятлення бацькоўства да экспертаў звярнуўся жыхар Кобрына. Разам з жонкай яны выхоўвалі чатырох дзяцей. Падчас разводу жанчына на эмоцыях абмовілася, што бацька малых — іншы мужчына. Каб пацвердзіць або абвергнуць гэтыя словы, кобрынец вырашыў правесці генетычную экспертызу. Атрымаўшы заключэнне эксперта, мужчына быў здзіўлены — яго бацькоўства ў дачыненні да дзяцей выключанае.
Аспрэчыць бацькоўства ў дачыненні да пяцярых малагадовых дзяцей вырашыў жыхар Баранавіцкага раёна. Кроўныя сувязі з дзецьмі ў яго заўсёды былі пад сумневам. Мужчына разводзіўся з жонкай, і пытанне выплаты аліментаў было ключавым. У гэтай гісторыі кропку паставілі вынікі ДНК-даследаванні. Эксперты-генетыкі выключылі бацькоўства мужчыны, пяцёра дзяцей аказаліся не ягонымі.
Сумневы ў кроўным сваяцтве ўзніклі ў жыхара Лунінецкага раёна. З жонкай яны выхоўвалі чатырох дзяцей, малодшым з якіх споўнілася чатыры гады. Мужчына ініцыяваў правядзенне генетычнай экспертызы. У заяўніка і дзяцей узялі ўзоры крыві і сліны. З імавернасцю больш за 99,9% трое дзяцей аказаліся не ягонымі, бацькоўства ў дачыненні да аднаго дзіцяці пацверджанае.