Латвійская кампанія Lanekss, якая забяспечвае прадуктамі харчавання дзяржарганізацыі, а таксама армію, паставіла Нацыянальным узброеным сілам (НУС) гарбату з Расіі і соль з Беларусі. Пра гэта паведамілі ў «Панараме» на латвійскім тэлебачанні, піша Delfi.
Прадукты для вайскоўцаў заказваюць праз Дзяржаўны цэнтр лагістыкі і закупак. У кастрычніку 2023-га армія Латвіі атрымала 2,6 кілаграма гарбаты, увезенай з Расіі, а ў студзені 2024-га — сем кілаграмаў солі беларускай вытворчасці.
У выніку давялося апраўдвацца чыноўнікам. Паводле намесніка начальніка Аб’яднанага штаба НУС па пытаннях падтрымкі Каспарса Зданоўскіса, у дамовах не гаворыцца, што гэтую прадукцыю нельга ўвозіць з Расіі і Беларусі, да таго ж на прадукты харчавання санкцыі не распаўсюджваюцца. Аднак ён адзначыў, што такі пункт могуць уключыць у дамову падчас працы з пастаўшчыкамі. Зданоўскіс дадаў, што названыя прадукты больш не трапяць у сталоўкі латвійскіх вайскоўцаў.
Пры гэтым узброеныя сілы пакуль працягнуць супрацоўнічаць з Lanekss, бо рашэнне пра спыненне працы НУС з гэтай кампаніяй можа прыняць толькі суд.
Цяпер юрысты вывучаюць магчымасць пакараць канкрэтнага камерсанта, які паставіў беларускую соль і расійскую гарбату латвійскай арміі.
Адна з кіраўнікоў кампаніі, Ніна Сіліня, у сваю чаргу адзначыла, што Lanekss адклікала ўсе ўгоды па закупцы тавараў, якія маюць хоць нейкую сувязь з Расіяй і Беларуссю. Акрамя таго, кампанія больш не закупляе прадукты, якія вырабляюцца ў Расіі і Беларусі, прычым нават тыя, якія не ўвайшлі ў санкцыйныя спісы. Гэта адбылося, калі ў «Панараме» ў студзені паказалі сюжэт пра тое, што гарбату расійскай вытворчасці паставілі Латвійскаму тэлебачанню.
Сітуацыю пракаментаваў таксама міністр абароны Андрыс Спрудс. Ён выступіў адназначна супраць паставак прадуктаў з Беларусі і Расіі.
Што ж да магчымасці поўнай забароны на ўвоз харчавання з гэтых краін у Латвію, то кіраўнік урада Эвіка Сіліня патлумачыла, што гэта магчыма ў выпадку прыняцця дзяржавамі — удзельніцамі Еўрасаюза сумеснага адпаведнага рашэння.