Пасля засухі ў ліпені і жніўні, якая прывяла да падзення ўзроўню вады ў рацэ Дунай, паблізу сербскага партовага горада Прахава знайшлі абломкі караблёў нямецкага флоту, што патанулі тут падчас Другой сусветнай вайны. Яшчэ чатыры судны, датаваныя перыядам да 1950 года, таксама паказаліся з-пад вады ў венгерскім нацыянальным парку Дунай-Драва ў раёне горада Мохач. Караблі ля Прахава былі аднымі з сотняў затопленых уздоўж Дуная чарнаморскім флотам нацысцкай Германіі ў 1944 годзе падчас адступлення перад наступам савецкіх войскаў, пры гэтым самі караблі былі знішчаныя. Гэта не першы раз, калі патанулыя судны паказваюцца над вадой Дуная. Паглядзіце на рэшткі флоту нацысцкай Германіі, якія зноў падняліся на паверхню праз засуху.
У аўторак узровень вады ў Дунаі ў сталіцы Венгрыі Будапешце склаў 1,17 метра, што параўнальна з рэкордна нізкім узроўнем 0,4 метра, зарэгістраваным у кастрычніку 2018 года. Падчас паводкі ўзровень вады тут падымаецца нашмат вышэй за 6 метраў.
«Усходняя Еўропа перажывае крытычную засуху, якая адбіваецца на ўраджаі і расліннасці», — гаворыцца на сайце еўрапейскай кліматычнай службы Copernicus у апошняй справаздачы, апублікаванай у пачатку месяца. Доўгачаканыя дажджы пачаліся ў панядзелак, і чакаецца, што на выходных узровень Дуная ў венгерскім Мохачы падымецца прыкладна да трох метраў — тады рака, хутчэй за ўсё, зноў накрые затанулыя караблі.
